ألمانيا-منير لكماني
يا موجة غدارة مخبولة
سبتة فالعين تبان محلولة
واللي حسب البحر جولة
يمكن يرجع غير حكاية
فدمعة أم ما هي مسلولة
لا تغرك زرقة الموجة
راه الزين مرات يكون حيلة
تضحك لك من بعيد مدلولة
ومن تدخل شوية فحضنها
تولي غولة ما هي معلولة
يا وليدي رد بالك من العومة
الموت ما عمره كان رجولة
والقبر ما يعطي لا إقامة
وسبتة ما تسوى دمعة
فخد مّاك تبقى مسلولة
نيني يا وليدي نيني
ما تخلي كلامهم يغريني
اللي قال لك البحر ساهل
قول ليه: سبقني وورّيني
وإلى رجع سالم من ليلتو
عاد يجي وينصحني
قالو الضفة قريبة
والقرب فيها خديعة عجيبة
بين «نوصل» و«ما نوصل»
موجة تبدل لك النصيبة
وتخلي أم عند الباب
تسول الريح على الغيبة
غوت غوتة حنينة
فيقات اللي كان نايم
رقدو قوارب الرحمة
وناضو أصحاب المآتم
واللي كان محتاج كلمة فالبر
لقاها من بعد ففم العزايم
غوت قبل الغوتة الأخيرة
قبل الروح تولي أسيرة
قبل مّاك تشد تصويرة
وتقول للبحر كل ليلة:
رد ليا اللي كان فالدار
ضحكة ونفس وسيرة
واحد قال: نمشي فالليل
واحد قال: البحر قليل
واحد شد فقرعة خاوية
وواحد شد فحلم طويل
والبحر ما فرق بينهم
لا قوي لا ضعيف لا هزيل
قالو: الناس عامات ووصلات
وما قالوش شحال من دار تسدات
قالو: فلان داز فساعة
وما قالوش شحال من ساعة ماتت
حيت اللي وصل عندو لسان
واللي غرق حكايتو سكتات
اللي نجا يحكي روايته
واللي غاب الموج طوى حكايته
ومن هنا كيكبر الوهم
حيت الميت ما يقول نهايته
وما يرجعش يوقف حد خوه
ويقول: لا تعاود تجربتي
يا صاحبي خذها وصية
الفقر يوجع ماشي خطية
والباب يتسد ماشي نهاية
والحال يضيق ماشي قضية
أما تعطي روحك للموج
فهاد الصفقة ما فيهاش تانية
البر إلا ضاق يتوسع
والحلم إلا طاح يتجمع
والباب إلا تسد اليوم
غدا باب غيرو يتشرع
أما البحر إلا خدا اسمو
حتى الندم ما ينفع
غوت غوتة حنينة
فيقات كل من كان نايم
من بعد ما سكت الصياح
بان كل واحد فاهم
وكان الولد محتاجهم قبل
ملي كان بين «نبقى» و«نغامر»
ناضو بالشمعة والدعاء
ناضو ملي سالى النداء
دارو الصورة وسط الورد
وسمو الحزن بالقضاء
والولد كان باغي غير باب
يتحل قبل هاد العزاء
يا بحر مالك أمان
وجهك زرقة وقلبك دخان
تقول للشاب: قرب شوية
راه الخير فذاك المكان
ومن يدخل وسط حضنك
تمحي حتى اسمو والعنوان
يا سبتة ماشي نتي الغاية
نتي غير مراية للحكاية
كتباني قريبة لعين الجائع
وبعيدة على عين الدراية
وشحال من واحد جرى عليك
وهو فالحقيقة هارب من البداية
يا وليدي شوف مّاك
قبل ما تشوف الضفة هناك
شوف اليد اللي رباتك
والعين اللي سهرت معاك
واش ورقة فبلاد الناس
تسوى قلب يموت وراك؟
نيني يا وليدي نيني
والدار ولو ضاقت تحويني
خبز يابس بين يدين مّاك
خير من موجة تلويني
خير ألف نهار بلا فرحة
ولا ليلة ما ترجعني
ماشي كل ضو منارة
وماشي كل باب بشارة
وماشي كل واحد قال «جرّب»
عارف شحال كتسوى الخسارة
كاين اللي يبيع لك البحر
وهو عمره ما بلل رجليه بقطرة
غوتو اليوم قبل غدا
قولوا للشاب: روحك ما تتشرى
لا سبتة تسوى دمك
لا حلم يتبنى فوق الردى
اللي باغي يوصل لغدا
خاصو يبقى حي…
باش يشوف غدا.
